الكورس هو حقيقي ثري بالمعلومات ومعمول في مجهود يحترم من دكتور رغدة، اتمنى انه يوصل لكل الناس لأن التوعية بجسمك واحتياجته وأطوار الحمل والولادة حاجة مهمة جدا، ورغم إني طبيبة بس فيه معلومات كتير مكنتش على دراية بيها فحقيقي أنا انصح بيه الحوامل والمقبليين حتى على الحمل، وأحب اشكر دكتور رغدة على مجهودها، وبدعيلها تستمر وتثري الكورس أكتر وأكتر ونفسي حقيقي يوصل بمعلوماته القيمة للجميع

حضرت الدورة في حملها التاني، وزوجها طبيب نساء وتوليد، ولدت في بلد أوروبي.

لرحلة لما بتكون شاقة و طويلة و كلها قرارات و مسئوليات كبيرة و مؤثرة و لها علاقة بحياة مش بس إنسان واحد بل أسرة بحالها زي رحلة الحمل و الولادة و الرضاعة، مش بس بتكون متعبة و مجهدة بس كمان بيكون فيها توهان و مش عارفة تاخدي الكلام منين ولا منين. خصوصاً إن المصادر على النت كتير و محتاجة حد دارس عشان يقدر يتخير المعلومات.

بالإضافة إلى إن كل ست حواليكي مرت بالرحلة دي بتكون عاوزة تدلي بدلوها و تقول لك اللي عندها. فبالتالي الدورة و د/رغدة بالنسبة ليا كانت زي صحبة حكيمة و مرجعية صادقة في الرحلة دي عارفة توجهك فين عشان الواحد ميكونش مشتت و تايه و مش عارف يفكر في أنهو اتجاه زي معظم الحوامل و الأمهات في مجتمعنا.

هاجر راشد حضرت في الثلث الأخير من حملها الأول

الكورس أكتر من رائع و نصحت بي كذا حد

أنا ولدت لوحدي في الغربة ف مكانش معايا حد يعلمني أي حاجة غير د. رغدة

الكورس نفعني بالذات في الرضاعة الحمدلله بفضل الله تفاصيل الرضاعة من أول يوم كويسة

و جزء التغذية نفع جدًا و التغذية السليمة هي اللي دعمتني

أم حضرت في حملها الأول في بلد مختلفة

بجد من اكتر التجارب المفيده ليا في رحله الحمل وخلتني عرفه المفروض اعمل ايه في كل فتره وكانت بترد على تساؤلات كتير احيانا مكنتش بلاقي رد عليها عند الدكتوره والمعرفه دي خلتني أخوض التجربه بعلم ووعي واني طبيعيه في كل الي بمر بيه بجد انا بنصح كل الي حواليا بأنهم يسمعو الكورس ده لانه فعلا مفيد جدا.

حقيقي مبسوطة جدا جدا اني اخدت الخطوة وحضرت انا مكنتش لسه حامل لما سجلت في الدورة وكنت مترددة ومش عارفة اسجل ولا أأجل ولكن استخرت وسئلت صديقة كانت حضرت وتوكلت علي الله واشتركت ومن اول يوم لحد الان بعد اما ولدت سعيدة جدا وبرشح الدورة لكل الناس الي حواليا الدورة بشكل عام بتفرق في رحلتك في الحمل والولادة والرضاعة بتفرق في وعيك بالتغيرات الي بتحصل في جسمك وفي النونو بتاعك بتقلل التوتر والقلق كتير لانك بتبقي متوقع بنسبة ايه الي بيحصل وليه فرقت معايا مثلا في طريقة اكلي في الحمل والي فرقت كتير الحمد لله وكانت سبب في اني مزدش زيادة كبيرة في الوزن وقت الحمل فرقت مع زوجي مع انه مكنش متشجع يسمع في الأول بعدين لما سمع معايا شوية وشاف ان الدورة علمتني حاجات سمع وفرقت معاه في انه عرف التغيرات الي بتحصل وقت الحمل وبالتالي كل. دا عمل فرق كبير في شكل دعمه ليا الحمدلله والي فرق جدا جدا في رحلتي الحمدلله كانت الدورة من الأسباب الي خلتنا نخرج من تجربة الولادة بانها تجربة ايجابية مش معاناه وآلام وحاجة مخيفة زي ما دايما الناس بتفضل تتكلم عن الولادات.

أم حضرت قبل حملها الأول.

السعي بالتمارين الرياضية عشان تبقى ولادة طبيعية، أنا ولدت قيصري في الآخر، بس الجزء ده في الكورس كان مفيد ليا نفسيا جدًا و كان مساعدني معظم الحمل في احتساب أي تعب بدني و إحساس السعي في حد ذاته..

كنتي علي بالي وعايزة ابعتلك رسالة شكر وامتنان عشان دا أقل حاجة يعني أنا الحمد الله ولدت من شهر وحقيقي بفضل الله تجربة الحمل والولادة كانت تجربة جميلة ومرضية أنا ولدت ( VBAC ) ،، قد ايه رحلة الوعي في الدورة فرقت معايا الحمدلله.. جزاك الله خيرا يا رغدة وربنا يعينك فعلا والدورة توصل للناس كلها أحلى حاجة بجد الموثوقية في المعلومات والنسب وكدة واكتشفت ان فيه دكاترة مش عارفين الكلام ده وقد ايه حقيقي كم الصدمة اللي الواحد شافها من تصور السيدات عن القيصري وإزاي أنها هي اللي تطلب انا ممتنة ليك جدا وهروح اشوف الفيديو تاني بتاع الرضاعة عشان عايزة اشوفك ربنا يوفقك ويرزقك من فضله

أم حضرت في حملها الثاني، بتحكي عن تجربة ولادة طبيعية بعد ولادة قيصرية.

أنا بحب الرضاعة جدا.. زي فكرة "جعلت قرة عيني في الصلاة".. فانا "جعلت قرة عيني في الرضاعة".. كنت بأديها كل مرة كأني اول مرة اؤديها.

الكورس ساعدني جدا حقيقي لانه دعمني بالمعلومات العلمية.. انا مكنش عندي اي معلومات قبل كده عن الرضاعة.. و كشفلي عن المشاعر اللي جوايا لحبي في الرضاعة اللي تساعدني اكمل الرحلة اللي حكتها

فكرة الرضاعه والالم.. بصراحه كان فى حواليا تجارب سيئه جدا..

للرضاعه من ناس حواليا وده كان مخلينى خايفه ومرعوبه من كمية الالم اللى المفروض احس بيه طول ما ابنى بيرضع..

والمرعب فى الموضوع ان ده هيستمر فتره كبيره أو البديل انى أحرم ابنى من أهم غذاء وفايده وتواصل بينى وبينه

فانا كنت بين خيارين كلاهما صعب.. اتحمل الالم طول فترة الرضاعة أو ألجأ الصناعى واتحمل تأنيب الضمير..

فى الكورس فهمت انى كل ده وهم..وان الرضاعه من اجمل الفترات اللى بنعشها مع اولادنا تواصلنا معاهم ومش لازم ابدا اتحمل الالم..وان اكيد فى حاجه غلط لو فى الم وايه الوسائل المساعده لو ده حصل

النسبة للكورس، جزء الرضاعة ساعدني جداً بفضل الله كان تهيئة كافية لتخطي خرافات الرضاعة الشائعة زي إنها أكيد مؤلمة وعادي يكون في جروح وتشققات وعادي نتحمل الألم على ما نتعود، وندخل صراع الألم اللي ممكن يوصل لجروح محتاجة تدخُّل والرضيع اللي بيبكي لأننا مش قادرين نستجيب لاحتياجه بشكل كويس مع مقدار الألم ده،

وكمان خرافة إنه الرضاعة فعل فطري وكل الأمهات بترَّضع عادي بعد ما تولد فا منشيلش همه، وطلع إنه احتياج فطري للطفل لكن الأم متعرفش عنه حاجة على الأغلب عمرها ما شافت ده ولا اتعلمته من حد عشان يبقى فطرة... كل ده طلع مش عادي لأ...

وإنه الجزء ده محتاج ياخد وقته الكافي جداً في التهيئة قبل الولادة مش مجرد نشوف فيديوهين أو نقرأ كلمتين ونقول تمام خلاص كده لما نولد نشوف، لأ خالص الموضوع ده محتاج ياخد وقته علشان يتعمل صح